Presentación do I premio á normalización comercial e empresarial do Concello de Silleda

Hai un ano publicábamos un informe sobre a situación da sinaléctica en Silleda. Unha das conclusións máis importantes era que, se ben por parte das administracións había un compromiso co uso do galego (case un 90% dos sinais recollidos viñan neste idioma), non sucedía o mesmo por parte dos establecementos comerciais, onde os niveis de uso do galego estaba na veciñanza do 20%. Ante esta situación elaboramos varias propostas de actuación. Unha delas consistía na posta en marcha dun premio que recoñecese o labor daqueles comercios que apostan polo uso do galego na súa actividade empresarial. Propuxémoslle a iniciativa ao Concello de Silleda, quen se puxo en contacto coa asociación local de comerciantes, ECOS, e como vedes foi moi ben recibida. O concurso xa está en marcha e ata o día 17 poden recibirse as notificación dos comercios que opten ao premio. Calquera empresa ou particular pode presentar unha ou varias candidaturas perante a Concellería de Normalización Lingüística, xa por escrito, xa enviando un correo electrónico, a info@silleda.es, indicando o asunto e especificando o nome do establecemento, nome da persoa responsable e teléfono de contacto. As bases da convocatoria poden consultarse nesta ligazón
A foto sacámola da noticia en La Voz de Galicia
A noticia no web do Concello de Silleda
Tamén dan conta da proposta no portal do Centro de Documentación Sociolingüística de Galicia onde non só recollen a noticia, senón que fan unha redacción propia que mostra que están moi enterados do que estamos a facer para contribuir á normalización da lingua en Silleda.

As  bases do concurso:

Bases 1º PREMIO CONCELLO DE SILLEDA Á NORMALIZACIÓN LINGÜÍSTICA NAS EMPRESAS E COMERCIOS by As Ferreiras Silleda

Así é como conta a noticia o Faro de Vigo:
Os comerciantes e empresarios silledenses están chamados a participar no 1º Premio Concello de Silleda á Normalización Lingüística nas Empresas e Comercios, que convoca a Administración local en colaboración con instituto Pintor Colmeiro, a asociación ECOS e a Secretaría Xeral de Política Lingüística coa intención de galardoar a aqueles establecementos que empreguen a lingua galega no seu trato, na cartelería, na facturación e na relación cos medios e a publicidade. 

Carlos Negro, outra vez no Colmeiro

O alumnado de 3º e 4º da ESO sabe ben quen é Carlos Negro. O certo é que xa o coñecen en persoa pois estivo no noso centro o curso pasado para darlle norme a unha das nosas aulas.
Hoxe, 08/05/14, aproximadamente un ano despois, Carlos Negro volve a pisar o chan do Colmeiro para compartir co noso alumnado as impresións das lecturas de Makinaria e de Penúltimas tendencias. Se quixeras ter unha idea sobre estes dous libros recomendámosche as excelentes críticas que fixeron Mariña Castro [Penúltimas tendencias] e David Cabaleiro [Penúltimas tendencias, Makinaria]

Na Feira do libro de Santiago con Rosa Aneiros

 

Denise Varela e Alba Moreira, acompañadas da profesora Gracia Santórum acudirón o pasado 29 de abril á Feira do Libro de Santiago de Compostela. Alí explicaron as súas impresións sobre o libro de Rosa Aneiros, Ámote Leo A.

Pero non estiveron soas, estiveron acompañadas pola propia Rosa Aneiros e por Manuel Bragado, director de Xerais, a editorial que publica o libro.

Materiais sobre Xosé María Díaz Castro

Por quinto ano consecutivo a Coordinadora Galega de ENDL achéganos un completísimo portal con recursos, actividades e noticias sobre a figura homenaxeada no Día das Letras. Lembremos que xa o fixo así nos anos 2010 ( Uxío Novoneyra) , 2011 (Lois Pereiro) , 2012 (Valentín Paz Andrade) e 2013 (Roberto Vidal Bolaño). A estrutura do portal segue as mesmas directices que a de edicións pasadas: desde a páxina principal do portal podemos acceder a distintos recursos ordenados coas etiquetas: Materiais didácticos, Para saber máis, Bibliografía, Ligazóns, Audiovisual, Actividades dos centros, Arredor de Díaz Castro.
Todo este material, xunto coa peneira de materiais feita  Botóns, son os mellores puntos de achegamento a Díaz Castro.

Mariña Castro, unha alumna mergullada no mundo literario

Efectivamente, ela é Mariña Castro Fontao (3º ESO) e o vindeiro día 8 de Maio ás 20:00 participará na presentación do libro Penúltimas tendencias de Carlos Negro na libería Vagalume de Lalín.
Ademais Mariña formará parte do xurado do premio Xerais Xulio Verne que se outorgará a principios de xullo na Illa de San Simón. A cousa ten o su mérito pois para participar nas deliberacións deste xurado Mariña vai ter que ler 12 obras.

Entrevista a Suso de Toro

Cando hai uns días comentabamos que a xornada coa que compartimos experiencias con Suso de Toro foi unha especie de maratón, estámos contando unha verdade enorme. Se seguides algo este blogue, veríades como xa informamos de como Suso de Toro ofreceu unha charla ao alumnado da ESO, escoitou e estableceu un diálogo co de bacharelato ou inaugurou unha aula co seu nome. Aínda faltaba esta entrevista que Sonia Framiñán e Martina Domínguez lle realizaron na Aula de Vídeo e Radio do Colmeiro.

Denise e Alba na Feira do Libro de Santiago

O pasado 29 de abril Denise Varela e Alba Moreira, acompañadas pola profesora Gracia Santórum, participaron na presentación da triloxía de Rosa Aneiros Ámote Leo A.
Manuel Bragado, o director da editorial Xerais, comentou o acto coas seguintes palabras, tiradas do seu blogue Brétemas:

na presentación da triloxía de Aneiros, onde Denise Varela e Alba Moreira, integrantes do Clube Lectura pola Igualdade do IES de Silleda, opinaron sobre os dous volumes publicados e conversaron coa autora con sinceridade e profundidade sobre o texto literario. Rosa Aneiros confesou ao remate dunha conversa engaiolante para os asistentes, que «nos clubes de lectura as autoras enfrontámonos directamente ás novas xeracións». O de onte foi un serán de festa para a lectura, a Xeración da Esperanza tamén está nas lectoras novas. Saímos felices da feira.