30 de out. de 2012

Videoconferencia: "Facendo física de partículas polo mundo"

O vindeiro martes 6 de novembro de 12:30 a 13:30 asistiremos a unha videoconferencia, "Facendo física de partículas polo mundo". Está organizada pola Coordinadora Galega de Equipos de Normalización e Dinamización Lingüística, con motivo da celebración do III Día da Ciencia en Galego


Quen vai asistir á conferencia:
Os grupos de 4ºA, 4ºB, 4ºC, 1º Bacharelato A e 1º Bacharelato B.
A videoconferencia poderémola ver desde as aulas de audiovisuais.

Contido da conferencia:
Os experimentos do acelerador de partículas no CERN levan máis de dous anos de toma de datos. Neste período producíronse resultados científicos de grande interese. A descuberta dunha resonancia que podería ser o bosón de Higgs, que foi noticia de primeira páxina en todos os informtivos do mundo, a pescuda de partículas supersimétricas, os resultados na busca do plasma de quarks e gluons, o estado da materia do universo primitivo, son só algúns dos fitos acadados. Neste proxecto internacional traballan físicos galegos que colaboran con colegas de todo o mundo nun contexto multilingüe. Moitos deles utilizan o noso idioma para realizar parte do seu traballo, tanto no contexto informal de discusións entre eles, como para a realización de traballos científicos (teses e teses de mestrado) así como na docencia e a divulgación científica.
Quen vai impartir a conferencia
  •  Patricia Conde. Investigadora no LIP de Lisboa. Física do experimento ATLAS do CERN.   
  • Olaia Castro. Profesora no City University en Londres. Investiga en Teoría Cuántica de Campos. 
  • Abraham Gallas. Investigador no CERN e na USC. Físico do experimento LHCb do CERN.
  • Carlos Salgado. Investigador no CERN e na USC. Investiga o estado da materia nos primeiros instantes do Universo.
  • Cibrán Santamarina. Profesor da USC. Traballa no experimento LHC do CERN.
Nove científicos galegos que traballan no CERN asinaran un manifesto en defensa da lingua galega, reivindicando o seu uso en ámbitos do que moitos a queren excluir. Cómpre lembrar que o decreto que regula o uso das linguas no ensino non universitario sustántase na exclusión do galego das áreas científicas. Éste foi o detonante da posta en marcha da celebración dun día reivindacando a ciencia en galego.

Onde obter máis información
A CGENDL ofrécenos desde esta páxina materiais para seguirmos como un vídeo dunha conferencia celebrada hai dous anos ou un cómic explicando cales son as partículas fundamentais.

24 de out. de 2012

Volcán científico

No noso centro imos celebrar o III Día da Ciencia en Galego coa emisión volcánica dun documental de gran calidade subtitulado en galego grazas ao labor do realizado polo IES Aquis Celenis de Caldas. Eles mesmos realizaron esta actividade hai dous anos con grande éxito.
Con este acto queremos poñer de manifesto o complicado que é acceder a traballos de divulgación científica en galego. Nós poderemos facelo nesta ocasión, non porque conseguíramos un mínimo estatus de normalización da lingua galega na sociedade, senón polo traballo desinteresado duns compañeiros.
En segundo lugar, gostaríanos que vos interesárades polos temas que se desenvolven no documental e que continuedes profundizando no coñecemento do mundo que nos rodea.
As proxeccións desenvolverase o vindeiro luns 5 de novembro tal e como se indica no seguinte horario:
 
1ºA a 6ª hora. Profesora: Fe
1ºB a 2ª hora Profesora: Fe
2ºA: a 3ª hora.Profesora: Mónica Souto
2ºB: a 3ª hora. Profesora: Maru
3ºA a 2ª hora . Profesor: Bernardo
3ºB a 3ª hora. Profesor: Xosé Rodríguez

Serán 6 horas de ciencia en galego.  Algúns  privilexiados xa viron parte do documental. Preguntádelle se lles gustou!

23 de out. de 2012

Anuncio do III Día da Ciencia en Galego


A reivindicación do uso do galego nas actividades científicas e singularmente no seu ensino, co fin principal de denunciar un funesto decreto de plurilingüismo que pretende excluir o galego deste ámbito, é o eixo fundamental da celebración do Dia da Ciencia en Galego.
Para seguir as actividades arredor desta convocatoria:

  • Proposta de actividades de APETEGA (Asociación do Profesorado de Tecnoloxía de Galicia)
  • Conferencia vía web organizada pola CGENDL para o 6 de novembro na que destacados investigadores galegos da Universidade de Santiago de Compostela achegarán temáticas de interese curricular para o noso alumnado e os proxectos científicos que desenvolven na actualidade. Podedes apuntarvos; toda a información na ligazón.
  • Portal do III Día da Ciencia en galego

19 de out. de 2012

Cultigal Forte. O ENDL nun libro de texto

Na páxina 25 do libro de Lingua Galega de 1º da ESO recuperaron esta idea do noso ENDL do ano 2009.
Este prospecto utilizáramolo no Día das Letras dese ano, e así nolo explicaban no Trafegando


[cultigal.jpg]

 A medicina foi presentada nunha caixa creada para a ocasión. Velaquí está:
 
 
Para redondear o conto, e tendo en conta que esta medicina está no catálogo das que se poden prescribir a todos, grandes e pequenos, sen contraindicación ningunha, compría termos un modelo para receitar co Cultigal Forte:

18 de out. de 2012

Libro+CD+DVD: 'María Fumaça'


Seguro que vos vai gustar. Unha canción nunha tenda cos produtos etiquetados todos en galego.
Uxía, Magín Blanco, Isaac Palacín, Carlos Blanco, Tanxarina Teatro… e un mollo de artistas únense para botar a andar a locomotora musical máis divertida, atolada e sensible que nunca se viu.María Fumaça, un proxecto literario e audiovisual, constituído por un libro máis un cd e un dvd que gravita arredor da festa e da felicidade, pero tamén arredor de Ruí, un cativo que a pesar das súas dificultades pode gozar da música, cantar e bailar. Por iso, os temas musicais insisten na festa e fan bo o lema que preside todo o traballo: ‘Cantar e bailar para ser máis feliz’. Ademais dos temas de música, nos que participa o máis importante da música galega, o dvd incorpora un mollo grande de clips.
Estamos diante dun dos libro-discos máis sorprendentes de todos cantos se teñen publicado na nosa lingua nos últimos anos. Vía Editorial Galaxia

17 de out. de 2012

Só o 3% de ensino infantil en galego nas cidades

Segundo informa o dixital Praza, a Mesa pola Normalización lingüística presentou un estudo despois de preguntar en 282 centros educativos -públicos, privados e concertados- polo idioma empregado neste nivel educativo e o resultado, resume o seu presidente, Carlos Callón, é dun verdadeiro "varrido" da lingua propia de Galicia. Non en van, e malia ás preferencias das familias do alumnado, o galego está ausente por completo no 95,04% dos centros. Segundo "declaran" os centros consultados, a suma daqueles que empregan total ou parcialmente o galego no ensino de nenos e nenas de 3 a 6 anos non supón máis que un 4,96% do total, isto é, 14 colexios en todo o país. Nestes inclúense os 9 que din impartir todas as aulas de infantil en galego -o 3,19%- e os tres que "indican que teñen dúas liñas", unha para o galego e outra para o castelán. Estas cifras, explica Callón, supoñen que a actual situación non é "de bilingüismo, de trilingüismo nin de farrapos de gaita", senón dunha "exclusión" da lingua propia que, asegura, non ten parangón en ningunha outra autonomía con máis dun idioma.
A nota de prensa cos resultados do informe da Mesa pódese consultar aquí. E o esencial do informe aparece representado neste gráfico, relativo ao uso das linguas no ensino infantil nas cidades galegas.


16 de out. de 2012

Texto fantástico

Nunha proba escrita, e con non demasiado tempo, os alumnos de 2º da ESO debían redactar un texto fantástico. Efectivamente, un fantástico texto:

Comprobando que a súa espada con empuñadura de ouro, tan valiosa para ela tanto material como emocionalmente, seguía intacta, decidiu seguir o seu camiño. Mentres ía camiñando, cavilaba en todo o que podía encontrar, e sabía que debía estar alerta. Supuxo que a senda para chegar á cova na que habitaba un ave fénix que lle proporcionaría o elixir da vida para resucitar a todos os caídos no seu pobo, por mor da tiranía da Raíña e os seus partidarios, non sería un camiño fácil; non estaría cheo de fadas amables que a guiasen ata alí, senón, probablemente, de criaturas horribles. Acordouse entón dos pesadelos que a atormentaban dende nena. Desde que vira morrer a súa nai na rebelión contra a tiranía, eses pesadelos estaban presentes nas súas noites. Tocou a espada que lle legara no seu testamento e lembrou a promesa de que ao cumprir os dezasete anos seguiría este camiño para chegar á cova. A cova... os seus pensamentos absorbérona e non se deron conta de que estaba a dous metros dela. Non topara ningún obstáculo, que estraño...! Talvez o máis horrible a esperase dentro da cova do fénix. Tomou ar, palpou de novo a espada e pensou que quizais non volvese ver a luz do Sol, nin o brillo da Lúa. Nun último salaio, entrou. 

Por Mariña Castro Fontao (2ºA)

15 de out. de 2012

O vicio de ler

Neste caso trátase do libro "Os fillos do mar".
Podemos ver a esta alumna concentrada na lectura mentres repousa os pés na mesa














Ou a todo un grupo

















Por se quedaba algunha dúbida do libro que se trata


















Mesmo hai quen aproveita os últimos momentos antes de dar un paseo na bici
















.... ou quen fica colgado coa lectura. Debe ser ben interesante.
















Aquí demóstrase a victoria da lectura sobre o fútbol.
















... claro que non vai moi dereito cara a canasta

















Isto si que é control!













Lendo nas escaleiras













Lendo a pares












Lendo en grupo











O da dereita lendo a páxina da esquerda e a da esquerda lendo a páxina dereita











Incluso hai quen entre tanto libro non le













Lendo















Lendo sentada

















Lendo de pé













Cada quen ao seu

10 de out. de 2012

O bUSCatermos

Coincidindo co comenzo do mes de outubro, o Servizo de Normalización Lingüística da USC puxo a disposición dos internautas o acceso libre á base de datos terminolóxica bUSCatermos.
Esta ferramenta achéganos información sobre 150.000 conceptos de áreas especializadas en galego, español e inglés aínda que tamén conta con datos doutras linguas como o catalán ou o italiano)
Esta nova posibilidade é un paso adiante na divulgación da terminoloxía. Ata o momento dispoñíamos dos materiais do Servizo de Normalización Lingüística da UdC, 'Profesionaliza a túa lingua' e do Andel de traballos terminográficos do SNL da USC. Por centrar o tema, no campo das matemáticas podíanse consultar os seguintes manuais: Profesionaliza a túa lingua. Estatística e Profesionaliza a túa lingua. Matemática,extraídos dos recursos da UdC, ou este outro da USC:Vocabulario de matemáticas. Santiago de Compostela. Universidade., de Xosé Masa Vázquez (1995).
No caso de que teñades algunha dúbida sobre a forma correcta dalgún termo especializado de calquera materia, probade a usar esta ferramenta: o bUSCatermos.

8 de out. de 2012

Criadas e señoras



Criadas e señoras (The help, en inglés ou As serviçais en portugués) de Kathryn stockett
Esta novela está situada na cidade de Jackson, Mississippi, no ano 1962. A través de tres mulleres moi diferentes coñecemos como era a sociedade daquela época e especialmente, a relación entre as persoas brancas e as de cor. Estas últimas eran humilladas e carecían de dereitos fundamentais. Aibeleen e Minny son dúas mulleres de cor que traballan como criadas. A primeira vive soa, xa que lle morreu o fillo, e encántalle coidar os rapaces que hai nas casas nas que traballa. É unha persoa moi educada e xenerosa, que sempre intenta axudar a quen o precisa. Minny é unha muller forte, que ten unha familia que alimentar e un marido que a maltrata. Non lle gustan os brancos e intenta manter unha relación estrictamente laboral con eles. E por último, Skeeter é unha señorita branca dunha boa familia pero diferente ao resto de mozas da súa idade: o seu obxectivo non é buscar un marido rico; ela quere ser escritora.
Estas tres mulleres iniciaran un proxecto común que nos manterá en tensión durante todo o libro. Capítulo a capítulo, a trama medrará e a túa curiosidade tamén. Cando comeces a ler,  non queres parar. 

por Luis Maceira Cid (2º Bacharelato A)

3 de out. de 2012

Ollos de aula.1

A Coordinadora Galega de Equipos de Normalización e Dinamización Lingüística ofreceranos todos os meses unha revista, 'Ollos de aula' cuxo primeiro número podemos descargar aquí. De todas formas procuraremos pegar puntualmente neste blogue todas as edicións que cheguen aos nosos PCs.
'Ollos de aula' nace co obxectivo de ser unha revista para as familias na que a lingua e a normalización teñan sempre o seu espazo. Á marxe da portada,  conta con 6 seccións que xa aparecen explicadas na páxina 3 deste primeiro número.
Non deixedes de consultar as recomendacións que unha profesora do noso centro nos fai desde as páxinas deste primeiro número!
Ollos de Aula_n1